رحلة العمر /الشاعرة مروةمحمد فراج
رحله العمر
بقلم /مروه محمد فراج
يوم بعد يوم نكبر..
وسنين العمر بتجرى قوام
ومش بناخد من حياتنا إلا..
سنين ضاعت وسنين قدام
حبه صور وذكريات..
مع ناس جميله عشقناهم
ومهما بعدت المسافات..
عمرنا فلحظه منسيناهم
هنا ابويا كان واقف..
وايديه بتحادى علينا
ياما تعب لجل يجمع..
اللقمه والهدمه لينا
عمره فجهده مخلى..
لجل يوفى طلبتنا
فحياته الخير كان دايما..
يملى ويفيض حياتنا
كان بيقطع من قوته..
ويكذب ويقول شبعان
وظهره كان محنى علينا..
لجل نعيش بخير وأمان
و كانت تملى طيبه قلبه..
بتوج حياتنا بالحنان
ولأخر نفس فعمره..
ساندنا برضا قلبه
ومن بعده سايب سيرته..
تتحاكى الناس بحبه
ـــــــــــــــــــــــــــــــــــــ
وهنا أمى ست الناس..
معنى الخير والاحساس
نبع الحنان والطيبه..
وفاء ممزوج مع الأخلاص
مكنتش غير حبيبتى..
سرى وسبب فرحى
ومهما كنت بسكت..
عليها مش بعرف اخبى
امى اللى فضلت شاليه.. همى طول العمر
ضحت بشاب قلبها..
واستحملت من السنين المر
أمى اللى كانت تحكى..
بقلب مليان بالخير
أمى اللى ربت أخلاقنا ..
تتمنى دايما الخير للغير
ويوم مكنا نحزن..
نسمع فدقه قلبها الآه
يوم الفرح ميزورنا..
تبتسم ليها الحياه
ويوم مسبتنى وقلبى..
الآمه اتجمعت فاوجاعى
من يوم مراحت وصورتها..
دايما بتطارد أحلامى
وعمر قلبى منساها..
فكل لحظات أيامى
ــــــــــــــــــــــــــــــــــــــــــ
هنا ذكريات عشناها..
أنا وأخواتى أجمل أيام
روح واحده ساكنه جسدنا..
مع بعض بنعيش فسلام
كنا بنتقاسم فحياتنا..
ونحكى يومنا قبل منام
نصحى على أجمل شمس..
بتنور سمانا بالأمان
نصحى على فجر بيشقشق..
وفنوره نجرى ونلعب
ايدينا فبعض ماسكه..
نفرح مع بعض ونتعب
ـــــــــــــــــــــــــــــــــــــــ
هنا ذكريات عشناها..
مع ناس بجد حبناهم
صور نشوفها نبتسم..
وتسرق سنينا معاهم
كبرنا وكبر العمر بينا
والرساله سلموها اهلينا
واحنا دلوقتى واجب علينا
نكمل وناخد الدور مكانهم
عايشين بروحهم وتفاصيلهم
ووراثين فرحهم والآمهم
يارب على الدنيا قوينا..
نقدر نوصل رسالتنا
وارضى يارب علينا..
يوم متنتهى رحلتنا
