بحبك وبيننا سفر .. الشاعر أيمن بلال
……….بحبك وبيننا سفر
هليتي والفجر بعدك طل
وفتح لعينيكي الياسمين والفل
وورق الشجر ربيعه بدري حل
وجمال الدنيا عالناس هل
…………………………………….
وأنا اللي موعود لي أحبك
وأتمني يطرح زماني بقربك
لقيت القلب مال جنبك
وفرد جناح الحب عالكل
……………………………………..
هواكي ساكن زمان عمري
باني جدوره ف عقلي وقلبي
لو كنتي ذنب عاشق ذنبي
ياشجرة فيها النسيم والضل
……………………………………….
كاتب غنوتي ف اسمك
شايف دنيتي ف صورتك
وحلمي أنول يوم حبك
وتبقي الحبيبة وتبقي الخل
………………………………………..
ماشي وعشقك وموالي
ولقلبك سكتي وترحالي
لو شفتي في حبك حالي
أكيد عيونك هتحن عليا وتطل
………………………………………..
بيني وبينك صورة وكلمتين
وحلم اللقا داب م الحنين
ياتنطق الصورة وتمد الايدين
يابساط ياخدني عليكي وأطل
…………………………………………
لو كنا ف زمن غير الزمان
زمان السحر والخيال والجان
وأملك بساط وانا عليه سلطان
كنت جيتلك وف ايدي عود الفل
………………………………………….
بيني وبينك طريق وسفر
وأماني عشق وغنوة ووتر
تقولك امتي ينزل علينا المطر
ونلقي لحبنا البعيد حل؟
….. أيمن بلال ….
