الشاعر عبدالله ابو النجا

بعد نص
(حييجي اليوم وحتودع)
تخيلت لحظة الاحتضار .. الله اعلم شكلها ايه لكن انا تخيلت بعد العجز عن النطق
فكتبت (الاحتضار)
*****
خلاص يابني
خلاص حمْشي
واسيبك .. يلا ودّعني

وافوت كل الحياه وياك
ولا فيه شيء
يرجّعني
*****
وانا فوق الفراش مطروح
ومستني طلوع الروح

واهي دموعي واحشها البوح
لتتكلم وتسمعني

تناديلك وتحكيلك
وتشكي آلام بتوجعني

خلاص يابني
خلاص حمْشي
واسيبك .. يلا ودّعني
*****

وانت مهما تبكي خلاص
ولو كانت دموعك سيل

مابيني وبينك الاحساس
بيحكيلك عذاب الويل

لساني وقف عن التعبير
اقولك لمّا تسألني

خلاص يابني
خلاص حمْشي
واسيبك .. يلا ودّعني
*****
نصحتك عمر فات منّي
وضخيت لك عطور عمري

وربيتك على النني
وعايزك تبقى خير منّي

لكن انته قفلت اذان
ياريتك كنت تسمعني

خلاص يابني
خلاص حمْشي
واسيبك .. يلا ودّعني
*****
وبكره تعلمك ايام
وتبكي دموع على الماضي

ويبقى الماضي ليك احلام
وكنت عليه عامل قاضي

عشقت في دنيتك اوهام
وعمرها يوم ما تجمعني
خلاص يابني
خلاص حمْشي
واسيبك .. يلا ودّعني
******
حسيبك يابني للايام
ما كنت عليّا مش راضي

حا تعرف بعد موتي آلام
و تفكيرك د كان فاضي

حيبقى الماضي شبه منام
وحلم حلمته كان وردي

خلاص يابني
خلاص حمْشي
واسيبك .. يلا ودّعني
******
عبدالله ابو النجا