الشاعر أيمن بلال

…. حبك خيال …

وتلف الحياه وتدور
وبيني وبينك بحور
ومين هيعدي بينا
نلقي الليل إللي لينا
ويعدي الشوق علينا
وياخدنا للهوي ونزور

ف عينيكي لقيت مرساتي
ولقيت ويا هواكي حياتي
وزمان كان صعب علينا
حلمنا بيه سنين ينادينا
ولا مرة كانت أيامه لينا
نعديله بحور نلقي بحور

وف لحظة لقيتك جنبي
دي صورتك اللي ف قلبي
واخداني تدور عليكي
بين الوشوش يمكن ألاقيكي
وف كل عيون بأشوف عينيكي
بقلبي اللي ف هواه مكسور

عشتك سنين وسنين خيال
ولا يوم قلت لقاكي محال
ترحل سنيني ف عشقك
أسهر ليالي الشوق بوعدك
شايل باقي عمري لحبك
ومن حلم لحلم تعدي شهور

لا عمر اليأس ف لقاكي غلبني
ولا ليل عدي صورتك تفوتني
أتغرب وف عينيكي اوطاني
أعيش وضحكتك اللي سكناني
وإبتسامة تحلفلي يوم هتلقاني
وف عز الضلمة أشوفك نور

ياحب صعب يتوصف للبشر
لا عرفه ليل ولا يتشاف بالنظر
إحساس ساكن في قلبي جنون
لا يعرف خوف ولا حتي ظنون
خيال جوا خيال ف ليل مجنون
وأيام حوالين ضيا عشقك تدور

…. أيمن بلال …